Sports Day 2023

       બાળક કે મોટેરા દરેકના જીવનમાં ફિટ અને સ્વસ્થ રહેવા માટે સ્પોર્ટ્સ અતિ મહત્વનું છે. રમત-ગમતને જીવનનો અભિન્ન ભાગ બનાવીને દરેક વ્યક્તિએ તેની રોજનિશીમાં સ્પોર્ટ્સ માટે સમય કાઢવો જ પડશે. સતત કામ અને ભાગ દોડની આજની જીંદગીમાં આપણને ડોક્ટર ચેતવણી આપે ત્યારે આપણે હળવી કસરત કે ચાલવું કે સાયકલીંગ કરવા લાગીએ છીએ. આજનો યુવાન ફિલ્મ સ્ટારો જેવી બોડી બનાવવા માટે જીમમાં વધુ જવા લાગ્યો છે. દરેક વ્યક્તિ આખા દિવસમાં ઓછામાં ઓછી એક કલાક કસરત કે મનગમતી આઉટડોર કે ઇનડોર ગેઇમ્સ રમવી જરૂરી છે. આજનો ખેલ દિવસ શારીરીક પ્રવૃત્તિઓ, રમતગમત સાથે એકંદર આરોગ્ય વિશે જાગૃત્તિ લાવે છે.

       શિસ્ત, દૃઢતા, રમતની ખેલદીલી, ટીમવર્ક, સ્વસ્થ અને ફિટ રહેવા માટે પણ સ્પોર્ટ્સ દરેક માનવી માટે અગત્યની છે. રમતગમત બાળકોમાં ઘણા ગુણોનું સિંચન કરે છે, આજના યુગમાં તો સ્પોર્ટ્સનું મહત્વ વધારે છે એટલે જ અભ્યાસક્રમમાં પણ શારિરીક શિક્ષણનો વિષય ભણાવવામાં આવે છે. શાળામાં ભણતા છાત્રો પણ સ્પોર્ટ્સના તાસમાં વિવિધ રમતો રમીને શરીર ફીટ રાખી રહ્યા છે. આપણા દેશમાં ફીટ ઇન્ડિયા મુવમેન્ટ પણ ચાલી રહી છે. જેના પગલે લોકો તંદુરસ્તી પરત્વે જાગૃત થયા છે. શરીરની તંદુરસ્તી માટે વોકીંગ, સાયકલીંગ જેવી ઘણી કસરતો કરીને આજનો માનવી તંદુરસ્ત જીવન જીવી રહ્યો છે. પહેલાના જમાનામાં ઘણા ગ્રાઉન્ડો રમત-ગમત માટે હતા.

       શાળામાં પણ વિશાળ ગ્રાઉન્ડ હતા પણ આજના યુગમાં તો હવે બાળકોને રમવા માટે મેદાનોની અછત થઇ ગઇ છે. સાથે શાળા પણ મેદાન વગરની જોવા મળે છે. આજના દિવસની સાચી ઉજવણી દરેક મા-બાપે આજે સંતાનો સાથે આપણી દેશી રમતો રમીને ઉજવણી કરવાની જરૂર છે, આમ કરવાથી બાળકો આ રમત વિશે જાણશે અને અન્યો સાથે રમવા પ્રેરાશે.

       આજના ઇન્ફરમેશન ટેકનોલોજીના યુગમાં વિવિધ ઇલેક્ટ્રોનિક ગેઝેટ આવતા બાળકો મોબાઇલમાં જ ગેઇમ્સ રમવા લાગ્યા હોવાથી આપણી શ્રેષ્ઠ દેશી રમતો તેમજ મેદાન ન હોવાને કારણે શાળાકીય રમતો સાવ લુપ્ત થઇ ગઇ છે. રમતને સીધો સંબંધ મનોરંજન સાથે હોવાથી તે રમવાથી સ્ટ્રેસ  મુક્ત થવાય છે. થપ્પો, નારગોલ, રૂમાલદાવ, ચોપાટ, ઇસ્ટો, ખુચામણી જેવી ઘણી રમતોની મઝા આજની પેઢીને ખબર જ નથી. રમત રમતું બાળક, ધૂળમાં રમતું બાળક ખડતલ બનતું હતું. આજે મા-બાપો જ બાળકોને રમવા બહાર જવા દેતા ન હોવાથી તે ઘરમાં જ મોબાઇલમાં વિવિધ ગેઇમ્સમાં આનંદ સાથે બેઠાડું જીવન જીવતો થઇ ગયો છે. રમતગમતથી લિડરશીપ અને એકાગ્રતાના ગુણો ખીલે છે. જેની પૂર્તિ કરવા આપણી શાળામાં SPORTS DAY 2023 નું આયોજન કરવામાં આવ્યું હતું.